Татарстанның Балык Бистәсе районында яшәүче 44 яшьлек ир-ат үзенең дүрт яшьлек баласын бер елга якын матди ярдәмсез калдырганы өчен колония-җирлеккә хөкем ителгән.
ТР прокуратурасы мәгълүматларына караганда, ир-ат ун ай дәвамында алимент түләмәгән, баласы алдындагы бурычларын системалы рәвештә үтәмәгән. Ваемсыз әти моңа кадәр дә шушы ук сәбәп белән административ җаваплылыкка тартылган булган.
Җыелган алимент бурычының гомуми суммасы 395 мең сумга җиткән.
Суд утырышында ир-ат үз гаебен тулысынча таныган. Нәтиҗәдә, суд карары белән ул 7 айга колония-җирлеккә хөкем ителгән.
Бу очрак — баланың хокукларын яклауның сүздә генә калмавын, ә җавапсызлыкның иртәме-соңмы җәзага китерүен янә бер кат раслады.
